Jambyl oblysynyń ákimi Asqar Myrzahmetovtyń tóraǵalyǵymen oblys ortalyǵyndaǵy bazarlar men ózge de saýda oryndaryn qoldanystaǵy zańnama talaptaryna saı retke keltirý jáne basqa da uıymdastyrý máseleleri týraly jıyn ótti. Atalǵan jıynda irili-usaqty saýda oryndarynyń jaı-kúıi jan-jaqty talqylandy.
Qazirgi tańda óńirde barlyǵy 43 saýda bazary bar. Onyń 29-y jańǵyrtýdy qajet etedi. Al, buǵan deıin 4 saýda orny tolyq, 6 saýda orny jartylaı jańǵyrtýdan ótse, 4 oryn qajet etpeıtinderdiń tiziminde eken. Jambyl oblystyq kásipkerlik jáne ındýstrıaldy-ınnovasııalyq damytý basqarmasynyń basshysy Arnur Muhametjanovtyń aıtýynsha, Taraz qalasynda 19 saýda bazary tirkelgen. Onyń 17-si ámbebap, 2-i mamandandyrylǵan saýda núkteleri.
Búginde aımaqtaǵy 5 iri saýda oryndaryna keshendi tekseris júrgizilip jatyr. Osy ýaqytqa deıin saýda oryndaryndaǵy pavılon ıeleriniń shamamen úshten biri salyq organdaryna tirkelmegeni anyqtalǵan. Bazar ıelerinen qoldaý bolmaǵandyqtan tekseris barysynda birqatar qıynshylyqtar kezdesýde. Soǵan oraı reıdtik tekseris bir aıǵa sozylmaq. Sonymen qatar, bazardyń tabysy men shyǵysyn barlaý úshin arnaıy hronometraj jasalynbaq.
Jıyn barysynda Asqar Isabekuly el ishinde aıtylyp júrgen áńgimelerdiń qısynsyzdyǵyn alǵa tartyp, óńirdegi eshqandaı bazar jabylmaıtynyn, ondaǵy saýda jasap kún kórip otyrǵan halyqtyń jaǵdaıy eskerýsiz qalmaıtynyn basa aıtty. Aldaǵy ýaqytta saýda oryndarynyń ıelerimen arnaıy memorandým jasalmaq. Ol qujatta bazardaǵy tazalyq, tártip, tótenshe jaǵdaılardyń aldyn-alýǵa arnalǵan saqtyq sharalary men qurylys normalarynyń saqtalýy, ózge de talaptarǵa saı bolýy sekildi kóptegen máseleler qamtylmaq. Bazardyń syrtqy kelbeti, bazardaǵy dúńgirshekterdegi taýardyń qarjylaı kólemin naqtylap otyrý sekildi jaıttar da nazarǵa alynady. Kún tártibindegi másele boıynsha jumys toby qurylyp, jospar bekitilmek. Sondaı-aq oblys basshysynyń qatysýymen turaqty túrde basqosýlar ótip turatyn boldy.
Hamıt Esaman,
«Egemen Qazaqstan»
Jambyl oblysy